Анх 1925 онд Женев хотноо болсон Хүүхдийн сайн сайхны төлөө дэлхийн чуулга уулзалтаас  зургадугаар сарын 1-ний өдрийг дэлхий нийтээрээ “Хүүхдийн эрхийг хамгаалах өдөр” болгох уриалга гаргаж байжээ. Энэ цаг үеэс хүүхдийн эрх, түүнийг хамгаалах тухай ойлголт бий болж, тусгайлан авч үзэх болсон. Энэ өдрийг манай улсад 1952 оноос эхлэн тэмдэглэж ирсэн юм. Баяр ёслол болгон тэмдэглэхээсээ гадна хүүхдийн эрх, эрх чөлөөг хамгаалах тухай асуудлыг хөндөж бодлогын хэмжээнд тууштай  арга хэмжээ авах цаг нэгэнт иржээ. Байгалийн гамшигт үзэгдэл, дайн дажин, гэмт халдлага болдог бусад улс оронтой харьцуулахад манайх тайван улс хэдий ч томчууд бидний хайхрамжгүй үйлдэл, хариуцлагагүй байдлаас улбаатай бяцхан үрс хорвоог орхисоор байна. Хамгийн сүүлийн жишээ гэхэд өнгөрсөн 7 хоногт 4-н бяцхан зүрх зогслоо. Барилгын компанийн хариуцлагагүй үйл ажиллагаа, хяналт шалгалт тавих ёстой төрийн байгууллагуудын ажилдаа хайхрамжгүй, сэтгэлгүй ханддагийн тод илрэл болж дөрвийн дөрвөн хүүхэд хорвоог орхилоо. Мөн дөрвөн сартай үрээ тэвэрсэн ээж байрны цонхоор  үсэрлээ гэх мэт аймшигт үйл явдлууд ар араасаа хөвөрсөн  7 хоног өнгөрч байна. Энх цагт эвий үрс томчуудын хайхрамжгүй болгоомжгүй үйлдлээс болж амь насаа алдсаар байх уу. Маргааш дэлхийд, манайд хүүхдийн эрхийг хамгаалах өдөр тохиох гэж байна.Чимээгүй өнгөрөх үү.