Засгийн газрын ээлжит хуралдаан 2022 оны тавдугаар сарын 31-нд болж дараах асуудлуудыг хэлэлцэн шийдвэрлэлээ.
 
Цэцэрлэгийн хүртээмжийг нэмэгдүүлэх чиглэлээр 2022-2023 оны хичээлийн жилд дараах арга хэмжээнүүдийг авч хэрэгжүүлнэ
 
Нийслэл Улаанбаатар хотын нутаг дэвсгэрт хүүхдийн цэцэрлэгийн хүртээмжийг нэмэгдүүлэх чиглэлээр 2022-2023 оны хичээлийн жилээс дараах арга хэмжээнүүдийг авч хэрэгжүүлнэ.
Сургуулийн өмнөх боловсролд хамрагдах насны хүүхдийн тоо, цэцэрлэгийн барилгын хүчин чадал, анги танхимын багтаамж, өрхийн мэдээллийн сан, гэр цэцэрлэг хоорондын зайнд үндэслэн өмчийн хэлбэр харгалзахгүйгээр нийслэлийн хүүхдийн цэцэрлэгийн хамран сургах тойрог тогтооход баримтлах аргачлал баталж, цэцэрлэгийн хамран сургах тойргийг шинээр тогтоон, 2022-2023 оны хичээлийн жилээс эхлэн мөрдөнө.
Цэцэрлэгийн хүртээмж багатай зарим дүүрэг, хороодын нутаг дэвсгэрт үйл ажиллагаа явуулж буй хувийн хэвшлийн цэцэрлэгийн барилгын сул орон зайд хамран сургах тойргийн цэцэрлэгт хамрагдаж чадаагүй хүүхдүүдээс нэмэлт элсэлт зохион байгуулах, тавигдах шалгуур, шаардлага хангасан тохиолдолд хувийн хэвшлийн цэцэрлэгүүдэд хувьсах зардлыг хоёр дахин нэмэгдүүлэн тооцож, хоолны зардлын хамт санхүүжүүлэхээр шийдвэрлэлээ.
Нийслэлийн хэмжээнд цэцэрлэгийн зориулалтаар иргэн, аж ахуйн нэгжээс барилга түрээслэх, худалдан авахад баримтлах үнийн жишиг тарифыг судалж шийдвэрлэхийг үүрэг болголоо.
Түүнчлэн ачаалал өндөртэй, төвийн дэд бүтцээс алслагдсан зарим дүүрэг, хороонд орчин үеийн технологи ашигласан гэр цэцэрлэг байгуулах асуудлыг судлан шийдвэрлэх, нийслэлд шинээр баригдах хотхон, хорооллын барилга байгууламжийн төлөвлөлтөд цэцэрлэгийн барилгын зураг төсөл, техник эдийн засгийн үндэслэлийг заавал тусгах талаарх барилгын норм, дүрэмд заасан шаардлагыг мөрдүүлэх, өмнө ашиглалтад орсон хотхон, хорооллын орон сууцны барилгын нэгдүгээр давхрыг цэцэрлэгийн зориулалтаар барилгын холбогдох норм дүрийн дагуу засварлан тоноглож эрх бүхий мэргэжлийн байгууллагын комисс хүлээн авдаг зохицуулалт хийж, хяналт тавих, байгууллагын цэцэрлэг ажиллуулах санаачилгыг дэмжих зэрэг арга хэмжээ авна.
Нийслэлийн цэцэрлэгийн хүртээмжийг сайжруулах эдгээр арга хэмжээг хэрэгжүүлэхэд 1000 орчим бүлгийн багш дутагдах судалгаа байна. Багшийг хөрвөх сургалтаар нэмж бэлтгэх, оюутан ажиллангаа суралцах боломж бүрдүүлэх, багшийг давтан бэлтгэх зэрэг ажлыг шуурхай зохион байгуулна. Цаашид сургуулийн өмнөх боловсролын багш мэргэжлээр суралцах оюутны сургалтын төлбөрийг төрөөс хариуцан санхүүжүүлэх асуудлыг судлан Засгийн газрын хуралдаанд танилцуулахыг үүрэг болголоо.
2022-2023 оны хичээлийн жилд нийслэлд сургуулийн өмнөх насны 141 мянган хүүхэд байгаагаас 106 мянган хүүхдийг төрийн болон хувийн өмчийн цэцэрлэгт хамруулах боломжтой, 34 мянган хүүхэд цэцэрлэггүй үлдэх эрсдэлтэй байна. Засгийн газрын өнөөдрийн хуралдаанаар шийдвэрлэсэн эдгээр арга хэмжээг авч хэрэгжүүлснээр цэцэрлэггүй үлдэх эрсдэлтэй 34 мянган хүүхдийг цэцэрлэгт нэмж хамруулна, сугалаагүй элсэх боломж бүрдэнэ, хоёр болон гурван настай нийт хүүхдийн 80-90 хувийг цэцэрлэгт хамруулна гэж тооцож байна.

Өмнийн говийн хөгжлийн зөвлөл байгууллаа
 
Монгол Улсын Ерөнхий сайд Л.Оюун-Эрдэнэ Өмнөговь аймагт ажилласан талаар Засгийн газрын хуралдаанд танилцуулж, тус аймагт ажиллахдаа өгсөн үүрэг, чиглэлийг хэрэгжүүлэх арга хэмжээний төлөвлөгөө батлан, хэрэгжилтэд нь хяналт тавьж ажиллахыг Монгол Улсын сайд, ЗГХЭГ-ын дарга Ц.Нямдоржид даалгалаа.
Мөн Ерөнхий сайдын захирамжаар Өмнийн говийн хөгжлийн зөвлөл байгуулахаар шийдвэрлэлээ.
Тус зөвлөлийн анхны хуралдаанаар “Цагаан дэл уул-Өлзий” автозамын боомт байгуулах тухай Засгийн газрын 2014 оны шийдвэрийг түдгэлзүүлсэн талаар ярилцах нь зүйтэй гэжээ.
Монгол Улсын Засгийн газрын “Хилийн боомтын талаар авах арга хэмжээний тухай” 2014 оны 246 дугаар тогтоолоор “Цагаан дэл уул-Өлзий” байнгын ажиллагаатай автозмын замын боомт байгуулахаар шийдвэрлэсэн. Гэвч Өмнөговь аймгийн Ханхонгор, Хүрмэн, Номгон сумын малчид, иргэд хилийн боомт хүртлэх автозам тавигдсанаар зам дагуух ашиглалтын зөвшөөрөлтэй уурхайнууд нээгдэж, улмаар говийн унаган байгалийн экосистемийг алдагдуулах, ховор ан амьтны байршилгүй болох, бэлчээр хомсдох зэрэг сөрөг нөлөөлөл үүснэ хэмээн эсэргүүцэл илэрхийлж буй юм.