Үндсэн хуульд 2019 онд оруулсан оруулсан нэмэлт, өөрчлөлтийн 39.1-т “Ерөнхий сайд болон Засгийн газрын дөрвөөс илүүгүй гишүүн УИХ-ын гишүүний албан тушаалыг хавсарч болно” хэмээн зааж, сайд нар “давхар дээл”-тэй байхыг хязгаарласан нь Үндсэн хуулийн суурь зарчим, үзэл санаа, тодорхой заалтуудтай зөрчилдөж байна гэж Цэц  их суудлын хуралдаанаараа шийдвэрлэв.

Их суудлын хуралдааны шийдвэр эцсийнх байдаг тул Цэцээс гаргасан дээрх тогтоолыг хэрэгжүүлэх нь хууль тогтоох байгууллагын үүрэг болохыг УИХ-ын гишүүн, ХҮН намын дарга Т.Доржханд онцолсон юм. Тэрбээр дээрх шийдвэр гарсны дараа мэдээлэл хийсэн бөгөөд хуульч Д.Үүрцайхын хамт өнгөрсөн оны арваннэгдүгээр сард Үндсэн хуулийн цэцэд дээрх асуудлаар мэдээлэл гаргасан юм.