Монгол Улсын Ерөнхий сайдаар Улсын Их Хурлын гишүүн Лувсаннамсрайн Оюун-Эрдэнийг чуулганы нэгдсэн хуралдаанд оролцсон 66 гишүүний 58 нь буюу 87.9 хувь нь дэмжсэн билээ. Тэрбээр чуулганы хуралдаанд гишүүдийн асуултад хариулахдаа жил орчим үргэлжилж буй цар тахлын дараа эдийн засаг сэргэх үед хоёр яам шинээр байгуулах төлөвлөгөөтэй байгаагаа мэдэгдсэн. Түүний хэлснээр эхний ээлжинд Эдийн засгийн хөгжлийн яам байгуулах аж. Энэ нь хөрөнгө оруулалтын томоохон төсөл, хөтөлбөрүүдийг гараанаас нь гаргах, хөрөнгө босгох асуудлыг хариуцан ажиллах юм байна. Харин төрийн данхгар бүтцийг цомхон, үр өгөөжтэй ажиллуулахын тулд Цахим хөгжлийн яам байгуулахаар зорьж байгаа ажээ. Ингэснээр төрийн бүх үйлчилгээг нэг дороос авах, авлига, хүнд суртал багасахад томоохон шинэчлэл болно гэж үзжээ.