УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нарын бүрэн эрхийг түдгэлзүүлэх Улсын Ерөнхий прокурорын саналыг УИХ-ын нэгдсэн чуулганаар хаалттай хэлэлцэж шийдвэрлэсэн билээ. Энэхүү хуралд хэчнээн гишүүн оролцсон, ямар ирцтэй байсан талаар УИХ дахь МАН-ын бүлгийн дарга Д.Тогтохсүрэн хэлэхдээ "Гишүүдийн бүрэн эрхийг түдгэлзүүлэх санал хураалтад 66 гишүүн оролцсон. Цаасаар нууц санал хураалт явуулсан юм. Хувь хүний асуудал, мөрдөн байцаалтын нууцтай холбоотой зүйл ярьж байгаа учраас гишүүний бүрэн эрхийг түдгэлзүүлэх асуудлыг нууцаар явуулах саналыг мөрдөн шалгах байгууллагаас тавьдаг. Хэлэлцүүлгийг нь нууцаар, санал хураалтыг ил явуулдаг байх нь зүйтэй. Бүрэн эрхийг түдгэлзүүлсэн хоёр гишүүний өрөө нь байна. Өөрийнх нь ажлын алба нь түдгэлзэнэ. Шалгаж дуусаад буруутай нь тогтоогдохгүй бол УИХ-ын тогтоол гарч, бүрэн эрхээ хэрэгжүүлэх боломжтой. Зарим нь гишүүнийг хамгаалах талаас нь ярьж, зарим нь хэрэгтэй танилцсан" гэлээ.