Эхнэр нь аав, ээжийнхээ сахиураар ХӨСҮТ-д очсон боловч орчин нь таалагдахгүй байна гэдэг байдлаар халдварын "улаан" бүсээс гарсан гэсэн мэдээлэл хэвлэлээр гарсантай холбогдуулан Шадар сайд, Улсын онцгой комиссын дарга С.Амарсайхан тайлбар мэдээлэл хийлээ. Тэрбээр "Манай хадам аав 100 хувь асаргаанд байдаг, 80 настай хөгшин. Хоёр хөгшин хоёулаа халдвар авсан нь батлагдсан учраас манай эхнэр аав ээжийгээ ХӨСҮТ рүү эхнэр маань хүргэж өгсөн.  Ахмад настнуудад энэ халдвар хүнд тусч байгааг би өөрөө мэдэрч явна. Тиймээс ахмадуудаа сайн асарч, хамгаалж, халдвараас сэргийлэхэд анхаарах шаардлагатайг иргэддээ хэлье.

Манай эхнэр мэргэжлийн байгууллагын зөвлөмжийн дагуу халдвар гарсан голомт буюу аав, ээжийндээ очиж тусгаарлагдаж байна. Дэглэм журмыг манай гэр бүл зөрчих ёсгүй. Тэр тал дээр олон нийтийн хөндөж байгаа сэдэв болон бусад асуудлуудаар хэн ч давуу эрх эдлэх ёсгүй.  Мэргэжлийн байгууллагын гаргаж байгаа зөвлөмжийг дагаж байна. Эхнэр маань гурван удаагийн шинжилгээ өгч, бүх хариу нь сөрөг гарсан. Төрийн өндөр албан тушаалтан гээд өөртөө давуу тал үүсгэсэн асуудал гараагүй" хэмээн тайлбарлалаа.