Сүүлийн хоногт улсын хэмжээнд хийсэн короновирусын шинжилгээний хариуг ХӨСҮТ-өөс танилцууллаа. ХӨСҮТ-ийн Тандалт, судалгааны албаны дарга А.Амбасэлмаагийн мэдээлснээр нэгдүгээр сарын 19-ний өдөр улсын хэмжээнд 13,318 хүнд коронавирусийн халдвар илрүүлэх шинжилгээ хийхэд 32 хүнээс халдвар илэрчээ. Эдгээр иргэд бүгд Улаанбаатар хотод амьдардаг аж. 

Тухайлбал, Өргөө амаржих газарт төрсөн эхийн гэр бүлийн ойрын таван хүнээс халдвар илэрсэн, үүний улмаас амаржих газрын ажилчид, үйлчлүүлэгчид нийт 357 хүнд шинжилгээ хийхэд урьдчилсан байдлаар халдвар илрээгүй байна. Мөн Баянгол дүүргийн 12 дугаар хорооны 19 дүгээр байрны нэг орцны зургаан айлын хүмүүс коронавирусийн халдварт өртсөн. Тухайн орцонд батлагдсан хоёр тохиолдол бүртгэгдсэн учраас НЭМГ-аас тандалтын шинжилгээ хийхэд 13 хүнээс халдвар илэрсэн гэлээ.

Мөн 38 хүн эдгэрч гэртээ гарчээ.