ЭМЯ-ны мэдээллээр сүүлийн 24 цагт 18871 хүний сорьцод шинжилгээ хийхэд коронавирусын халдварын 47 тохиолдол бүртгэгдлээ. Энэ нь өнгөрсөн өдөртэй харьцуулбал 3 тохиолдлоор буурсан үзүүлэлттэй байна. Улаанбаатар хотод өнөөдрийн байдлаар 13 голомт идэвхтэй байгааг тус яамнаас мэдээллээ. Эдгээрээс "Монгол шир" үйлдвэр, гутлын цех, ББСБ, "Микс пицца", Сонгинохайрхан дүүргийн 21 дүгээр хорооны худалдааны төв гэсэн голомтоос үүдэлтэй халдварын тохиолдол идэвхтэй байгаа аж. 

Дэлхий нийтэд уг вирусын халдвар сүүлийн өдрүүдэд 15 хувиар буурсан үзүүлэлттэй байна. Дэлхийн 73 улсын 134 сая хүн коронавирусын халдварын эсрэг вакцин хийлгэжээ. Өдөрт 7 сая хүн вакцин хийлгэж байгаа бөгөөд дархлаажуулалтын үр дүн улс орнуудад эхнээсээ өгч байгаа ажээ. Үүнээс хамгийн өндөр үзүүлэлттэй яваа нь Израиль улс юм байна. Тус улс хүн амынхаа 50 хувийг дархлаажуулжээ. 

Иймд маскаа байнга зүүх, хүн хоорондын зай барих, гараа тогтмол угааж, агаар сэлгэж байхыг ЭМЯ-наас уриалж байна.