Эрүүл мэндийн яамнаас 11 цагийн ээлжит мэдээллийг хийлээ. Сүүлийн 24 цагт 11183 хүний сорьцод шинжилгээ хийснээс коронавирусын халдвар авсан хүний тоо 127-д хүрсэн байна. ХӨСҮТ-ийн Тандалт, судалгааны албаны дарга Ж.Байгальмаагийн мэдээлснээр нийт халдварын тоо 4210 болсон байна. Эдгээрээс 126 нь Улаанбаатар хотод бүртгэгдсэн. Шинээр батлагдсан тохиолдлуудын 116-гаас нэг дэх шинжилгээгээр вирус илэрсэн бол долоогоос нь хоёр дахь шинжилгээгээр илэрчээ. Дөрвөн хүний халдварын эх уурхайг тодорхойлохоор ажиллаж байна.

Сүүлийн 24 цагийн хугацаанд клиникээс 52 хүн эдгэрч, гэртээ гарсан. Нийт эдгэрсэн хүний тоо 3083 боллоо. ХӨСҮТ, Цэргийн төв эмнэлэг, Хан-Уул дүүргийн 300 ортой эмнэлэгт нийт 1014 батлагдсан тохиолдол эмчлүүлж байна. Биеийн байдал маш хүнд гурав, хүнд гурав, хөнгөн 917 хүн эмчлүүлж байгаа ажээ.