Гэр бүл, хөдөлмөр, нийгмийн хамгааллын сайдын 2025 оны А/25 дугаар тушаалаар Хөдөлмөрийн аюулгүй байдал, эрүүл ахуй /ХАБЭА/-н стандартын улсын үзлэг зохион байгуулах ажлын хэсгийг томиллоо. Ажлын байранд ажилтны амь нас, эрүүл мэндийг хамгаалах, үйлдвэрлэлийн осол, мэргэжлээс шалтгаалсан өвчнөөс сэргийлэхэд тавигдах хэм хэмжээг стандартаар тогтоож өгдөг ба эдгээр стандартууд нь Хөдөлмөрийн аюулгүй байдал, эрүүл ахуйн тухай хуулийн хэрэгжилтийг хангахад чухал үүрэгтэй. ХАБЭА-н стандартад 5 жил тутамд үзлэг хийж, шинээр боловсруулах, шинэчлэн сайжруулах, хүчингүй болгох стандартыг тогтоож, цаашдаа салбарын хэмжээнд шаардлагатай стандартуудыг тодорхойлдог. Хамгийн сүүлд 2018 онд улсын үзлэг хийгдсэн ба энэхүү арга хэмжээ нь ХАБЭА-н тогтолцооны шинэчлэл 2025-2028 оны төлөвлөгөөний хэрэгжилтийн хүрээнд хийгдэх юм. Улсын үзлэгийг Гэр бүл, хөдөлмөр, нийгмийн хамгааллын яам, Хөдөлмөрийн аюулгүй байдал, эрүүл мэндийн төв, Стандарт, хэмжил зүйн газар болон мэргэжлийн холбоод, салбарын эрдэмтэн судлаачид хамтран энэ сард багтаан явуулж, ажлын явц, үр дүнг тайлагнан дүгнэж, стандартуудыг олон улсын жишигт нийцүүлэх, холбогдох хууль тогтоомж, бодлого шийдвэрт уялдуулан шинэчлэн боловсруулна.

Монгол Улсад өнөөдрийн байдлаар 6730 гаруй стандарт хэрэгжиж байгаагийн 150 орчим нь ХАБЭА-н салбарт мөрдөгддөг. Үүний 35% нь хөдөлмөрийн аюулгүй байдлын, 60% нь хөдөлмөрийн эрүүл ахуйн, 5% нь мэргэжлээс шалтгаалсан өвчний стандарт байдаг.