“Олон нийтийн оролцоонд түшиглэсэн урт хугацааны тусламж үйлчилгээний шинэлэг тогтолцоог хөгжүүлэх нь” туршилтын төслийн үр дүнг /2025.04.03/ хэлэлцлээ. 2020-2024 онд Гэр бүл хөдөлмөр, нийгмийн хамгааллын яам, Азийн хөгжлийн банктай хамтран уг төслийг аймаг, дүүрэг, сумын түвшинд хэрэгжүүлсэн. Төсөлд хамрагдсан ахмадуудад эмнэлгийн мэргэжилтэн, нийгмийн ажилтны цогц үнэлгээ хийн гурван хэсэгт ангилжээ. L1 буюу эхний хэсэгт хөдөлмөрийн чадвар 70-аас дээш хувьтай эрүүл, идэвхтэй ахмадууд орж байна. Харин L2 хэсэгт орсон ахмадуудад асаргааны үйлчилгээ хэрэгтэй байгаа бол L3 хэсгийн ахмадуудад байнгын асаргаа шаардлагатай байна.

Ахмад настны тухай хуулийн шинэчилсэн найруулгад “Ахмад настны цогц үнэлгээ гэж эмч, эмнэлгийн мэргэжилтэн, нийгмийн ажилтан ахмад настны бие бялдар, танин мэдэхүй, сэтгэлзүй, үйл ажиллагааны чадвар, нийгмийн тулгамдсан асуудлыг тодорхойлж, хэрэгцээ болон эрсдэлийн зэргийг үнэлэх мэргэжлийн олон талт үйл ажиллагааг хэлнэ” хэмээн заасан байдаг. Энэхүү төслийн үр дүнд манай улс анх удаа ахмадууддаа ийнхүү цогц үнэлгээ хийжээ. Удахгүй бүх ахмадуудад цогц үнэлгээг хийхээр зорьж байна.