УИХ-аас баталсан Ахмад настны тухай хуульд нэмэлт, өөрчлөлт оруулах тухай хууль 2025 оны 01 дүгээр сарын 01-ээс хэрэгжиж эхэлсэн. Эрүүл мэндийн яам, Гэр бүл, хөдөлмөр нийгмийн хамгааллын яам, Грентлогийн үндэсний төв, Хөдөлмөр, халамжийн үйлчилгээний ерөнхий газар, Монголын Ахмадын холбоо зэрэг байгууллагын төлөөлөл уулзаж хуулийн хэрэгжилтийн явц, цаашид хэрэгжүүлэх арга хэмжээний талаар санал солилцлоо. Хуулийг хэрэгжүүлэх журам, аргачлал, заавар Гэр бүл, хөдөлмөр, нийгмийн хамгааллын сайд, Эрүүл мэндийн сайдын хамтарсан тушаалаар бүрэн батлагдсан. Идэвхтэй насжилтыг дэмжих үйлчилгээ болон асаргааны хувилбарт үйлчилгээг иргэн, аж ахуйн нэгж, төрийн бус байгууллагаар гэрээлэн гүйцэтгүүлэхээр сонгон шалгаруулалтын зарыг аймаг, дүүргийн Хөдөлмөр, халамжийн үйлчилгээний газар, хэлтсүүд https://www.tender.gov.mn сайтад байршуулж, сонгон шалгаруулалтын ажил хийгдэж байна.

Ахмад настны цогц үнэлгээ хийх, кейс менежмент хийх, эрүүл мэндийн болон нийгмийн халамжийн байгууллагын ажилтнуудыг мэргэжлийн удирдлагаар хангах, сургах ажлын төлөвлөгөө боловсруулан холбогдох яамдын удирдлагуудад танилцуулан хэрэгжүүлэх чиглэлээр санал солилцов. үүнчлэн Дэлхийн эрүүл мэндийн 2020 оны 8 дугаар сард хуралдсан чуулганаас 2020-2030 оныг “Эрүүл насжилтын арван жил” болгон зарлаж, гишүүн орнууддаа “Эрүүл насжилтын үндэсний төлөвлөгөө” боловсруулан, хэрэгжүүлэхийг зөвлөмж болгосон байна. Үүний дагуу Эрүүл мэндийн яам, Гэр бүл, хөдөлмөр, нийгмийн хамгааллын яам хамтран “Эрүүл насжилтыг дэмжих ажлын удирдамж”, “Эрүүл насжилтын үйл ажиллагааны төлөвлөгөө”-г боловсруулан хоёр сайдын хамтарсан тушаалаар батлуулахаар ажиллаж байна.