Энэ жил тариаланчид нийт 616 мянган га-д тариалалт хийж, төлөвлөгөөгөө давуулан биелүүлсэн. Хөл хорионы дэглэм тогтоосон, цар тахал дэгдсэн амаргүй байсан ч 6-р сарын сүүлчээр орон нутгаас авсан мэдээллээр нийт улаанбуудай тариалсан талбайн 80 орчим хувь нь соёололтоороо чанарын онцсайн үнэлгээтэй гарсан. Буудайн соёололт онц сайн үнэлгээтэй гарсан нь тариалангийн бүс нутагт 5, 6-р сард хур тунадас ахиу орж чийг их өгсөнтэй холбоотой.

Урьдчилсан тооцоо судалгаагаар энэ жилийн хувьд улаанбуудайн хэрэгцээг дотооддоо бүрэн хангах боломж бүрдээд байна. Тариаланчдын уйгагүй хөдөлмөрийн дүн ийнхүү гарлаа. Гэсэн ч эрт баярлаж, санаа амарч боломгүй хариуцлагатай цаг үе. Ойрын өдрүүдэд болон энэ сарын сүүлээр цочир хүйтэрнэ гэсэн цаг агаарын урьдчилсан мэдээ гарсан тул ургацаа бүрэн авахын тулд дор бүрнээ хичээх хариуцлагатай өдрүүд өмнө ирлээ.

Засгийн газраас ургац хураалтын ажлыг технологийн хугацаанд дуусгах, цар тахлын үед хүнсний хангамжийг тогтвортой байлгах, нөөц бүрдүүлэх зорилгоор их, дээд сургууль, мэргэжлийн сургалт үйлдвэрлэлийн төвийн оюутан, сонсогч, цэргийн алба хаагчид болон ажил хайж байгаа иргэдийг ургац хураалтад оролцох боломжоор хангах шийдвэр гаргасан. Алтан намрын ажилд гар бие оролцож, амьдралынхаа нэгэн сайхан түүхийг бүтээх ажилд залуус идэвхтэй оролцохоо илэрхийлсээр байгаа нь талархууштай. Ургац хураалтын ажилд шаардлагатай техник, тоног төхөөрөмжийн бэлэн байдлыг хангаж, ургац тээвэрлэх зам, гүүрийн эвдрэл, гэмтлийг засварлах ажлыг цаг алдалгүй хийж эхэлсэн.

Энэ 7 хоногт ургацын урьдчилсан баланс гарч, ирэх сарын 15-наас ургац хураалтын ажил эхэлнэ. Энэ хүртэл бид цаг агаарын эрсдэлээс урьдчилан сэргийлж, хөдөлмөрийнхөө үр шимийг алдагдал хорогдолгүй хүртэхийн төлөө хичээцгээе. Та бүхэндээ ургацаа бүрэн авахыг уриалж байна.