Монголын Үндэсний Худалдаа Аж Үйлдвэрийн Танхимаас (МҮХАҮТ) 20 дахь жилдээ ТОП-100 аж ахуйн нэгжийг танилцууллаа.  Уул уурхай, олборлох салбарт үйл ажиллагаа явуулж байгаа "Эрдэнэс силвер ресурс" компани ТОП-100 аж ахуйн нэгжийн нэг болов. Тус компани байгалийн баялгийг зөв зохистой ашиглаж иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай хуулийг УИХ-аар 2020 оны нэгдүгээр сард баталсантай холбогдуулан хоёрдугаар сард ахмад настнуудын зургаан сая хүртэлх төгрөгийн тэтгэврийн зээлийг тэглэж, тэтгэврийн зээлгүй болон нэг сая төгрөгийн зээлийн зөрүүтэй нийт 216 мянган иргэнд тус бүрд нэг сая төгрөг олгох ажлыг шуурхай зохион байгуулж, 216,2 тэрбум төгрөг зарцуулсан. Уг компанийн хамт олны энэхүү амжилтыг үнэлж Монгол Улсын ТОП-100 аж ахуйн нэгжийн нэгээр шалгаруулсан байна.

Энэ жил ТОП-100 аж ахуйн нэгжийг цар тахлын үед шалгаруулснаараа онцлог байв. Компаниудын үйл ажиллагаа, гүйцэтгэлд ч цар тахлын нөлөө шууд ажиглагдав. Тухайлбал, ТОП-100 ААН-ийн нийт төлсөн татварын хэмжээ 33 хувь буюу 2.1 их наяд төгрөгөөр буурчээ. Харин ТОП-100 ААН-ийн нийт борлуулалтын орлого 32.6 их наяд төгрөгт хүрсэн нь манай ДНБ-ий 88 хувьтай тэнцүү бөгөөд мөн нийт татварын орлогын 49 хувийг бүрдүүлсэн ажээ.