Шатахуун хомсдож буй энэ үед Уул уурхай, хүнд үйлдвэрийн яам болон  импортлогч аж ахуйн нэгжүүдийн төлөөлөл ОХУ руу шатахууны асуудлаар хэлэлцээ хийхээр явсан. Тэгвэл УИХ-ын гишүүн асан О.Содбилэг цахим хуудсаараа "Роснефть компанитай уулзаж байна. Есдүгээр сард 1500 тонн АИ92 бензин, аравдугаар сард 44 мянган тонн АИ92 бензин, есдүгээр сард ачигдаагүй байсан 10 мянган тонн АИ92 бензин авахаар боллоо" гэж мэдээллээ. 

Ингэснээр ирэх аравдугаар сард 51 мянган тонн АИ-92 шатахуун авахаар болсон байна. ОХУ  28 мянган тонн шатахуун нийлүүлэх ёстой байсан ч  гол нийлүүлэгч Ангарскийн нефть химийн үйлдвэр дээр засвар хийж байгаа гэх шалтгаанаар  есдүгээр сард 17 мянган тонн шатахуун нийлүүлсэн.  “Роснефть” компаниас есдүгээр сарын 16-ныг хүртэл 7400 орчим тонн АИ-92 бензин нийлүүлсэн учраас  үлдсэн  9-10  мянган тонн  шатахууныг ирэх аравдугаар сард нийлүүлэхээр болжээ.