Хятадын “ByteDance” компанийн эзэмшдэг “TikTok” аппликейшнийг АНУ-д ашиглахыг тун удахгүй хориглох тухайгаа Ерөнхийлөгч Дональд Трамп өнгөрсөн баасан гаригт мэдэгджээ. Түүнчлэн тэрбээр уг платформыг Америкийн компани эзэмших, худалдан авахыг дэмжихгүй байгаагаа илэрхийлсэн байна.

“ТикТок” нь богино хэмжээний видео бичлэг хийж бусадтай хуваалцах зориулалттай цахим сүлжээний нэг хэлбэр бөгөөд өдгөө зах зээлийн үнэлгээ нь 100 тэрбум ам.долларыг даваад буй юм. Харин АНУ-ын зүгээс уг платформыг тагнуулын зориулалттай, хэрэглэгчдийнхээ хувийн мэдээллийг Хятад руу дамжуулдаг гэж буруутгаж байгаа билээ. Уг платформыг Энэтхэгт ашиглахыг хориглоод байгаа бол Япон улс мөн хориглох талаар хэлэлцэж буй юм. Нөгөөтэйгүүр АНУ болон Хятадын хооронд үүсээд буй хурцадмал байдлаас үүдэн АНУ холбоотон орнууддаа энэхүү аппликейшнийг хориглохыг шахаж байж магадгүй гэсэн таамаглал ч байгаа юм.

Түүний дээрх мэдэгдлийн дараа “TikTok”-ийг худалдан авахаар “ByteDance” компанитай хэлэлцэж байсан “Microsoft” компани хэлэлцээгээ зогсоосон тухай  “Wall Street Journal” сонин мэдээллэж байсан. Мөн АНУ-ын өөр хэд хэдэн компани “TikTok”-ийн хувьцааг худалдан авахаар сонирхож байсан гэнэ. Гэтэл саяхны мэдээгээр “Microsoft” компани “TikTok”-ийг худалдан авах талаар Трамптай ярилцсаар байгаагаа хэлжээ. “Microsoft” компани уг аппликейшны аюулгүй байдлыг шалгаж, АНУ-ын эдийн засагт өсөлт авчрах тал дээр анхаарч ажиллах болно гэдгээ цохон дурджээ. Тийм учраас “Microsoft” компани “ByteDance” компанитай хэлэлцээгээ аль болох хурдан буюу энэ оны 9-р сарын 15-аас хэтрэлгүй дуусгах хүсэлтэйгээр АНУ-ын засгийн газар болон ерөнхийлөгч Трамптай ярилцлагаа үргэлжлүүлэх ажээ.

Эх сурвалж: CNN