Сүүлийн үед Инстаграм хуудаснаа дэлхий өнцөг булан бүр дэх олон олон эмэгтэйчүүд өөрсдийн хар цагаан зургаа хуваалцах аян өрнүүлээд буй. Гэсэн хэдий ч хүн бүр энэхүү аян яагаад үүссэн болон ямар утга учиртайг тэр бүр сайн мэдэлгүйгээр хуваалцах нь ажиглагдсан. Хэрвээ та энэхүү хөдөлгөөнийг дэмжиж байгаа бол утга учир, гол мессежийг нь алдагдуулахгүй байх нь зүйтэй юм.

Эмэгтэйчүүдийн аллагын тухай сэдэв хамгийн хурцаар хөнддөг орнуудын нэг бол Турк юм. Зөвхөн 2019 онд гэхэд 500 орчим эмэгтэйн аллагад өртсөн тохиолдол бүртгэгджээ. Харамсалтай нь бүртгэгдээгүй тохиолдлууд үүнээс ч их байдаг ба энэ талаар бодит тоо баримт байдаггүй аж. Зөвхөн энэ долоо хоногт гэхэд л хэд хэдэн эмэгтэйчүүд аллагын золиос болжээ.

Туркийн засгийн газар, шударга ёсны систем энэхүү гэмт хэргийг зогсоох ямар ч оролдлого хийддэггүй, мөн гэмт этгээдүүд ямар ч ял шийтгэл амсалгүй үлддэг байна. Мөн түүнчлэн Туркийн засгийн газар эмэгтэйчүүдийг гэр бүлийн хүчирхийллээс хамгаалдаг Истанбулын конвенц дахь зарим заалтыг хүчингүй болгохоор завдаж байгаа ажээ. 

Туркчууд өглөө бүр сэрэхдээ Инстаграм, сонин хэвлэл, зурагтаар аллагад өртсөн эмэгтэйчүүдийн хар цагаан зургийг хардаг. Хар цагаан зургаа хуваалцах аян нь эмэгтэйчүүд өөрсдийн дуу хоолойгоо эмгэнэлтэйгээр амиа алдсан тэдгээр эмэгтэйчүүдтэй нэгэн адил бусдад хүргэх гэсэн мессежтэйгээр эхэлсэн. Учир нь нэг л өдөр зурагтаар хардаг тэр хар цагаан зургууд өөрсдийнх нь байх вий гэж тэд айж байна.