БНСУ-ын Сөүл, Кёнги зэрэг төвийн бүс нутагт 2022.08.08-ны өдрийн орой үргэлжлэн орсон усархаг борооны улмаас үер усны аюул үүсч 7 хүн нас барж, 6 хүн сураггүй болжээ. Ойрын 70 жилд ийм их устай бороо ороогүй бөгөөд Сөүл хот ихээхэн хохирол амсаад байгаа ажээ. Иймд үүсээд байгаа нөхцөл байдалтай холбогдуулан БНСУ дахь Монгол Улсын ЭСЯ-наас монгол иргэддээ хандан сэрэмжлүүлэг гаргажээ. Уг сэрэмжлүүлэгт, "...суугаа орны Гамшгийн аюулаас урьдчилан сэргийлэх төвөөс аврах байгууллагуудын бэлэн байдлын зэргийг “Ноцтой” түвшинд хүргэж нэмэгдүүлэв. Төвийн бүс нутагт бороо үргэлжлэн орж барилга байгууламж усанд автах, замын хөдөлгөөн болон нийтийн тээврийн хэрэгслийн үйл ажиллагаа доголдох, хөрсний гулгалт үүсэх зэрэг эрсдэл үүсч байгаа тул болзошгүй үер усны аюулаас урьдчилан сэргийлж, сонор сэрэмжтэй байна уу" гэжээ.