Америкийн Нэгдсэн Улсын Ерөнхийлөгч Жо Байден Америкийн цэргийн хүчийг Афганистанаас эргүүлэн татаж, Талибаны дайчдад эрх мэдлийг буцаан өгсөн улс төрийн шийдвэрээ хамгаалсан үг хэллээ. Америкийн цэргийн хүчин Афганистанд 20 жилийн турш үргэлжлүүлсэн цэргийн ажиллагааг зогсоосны маргааш Ерөнхийлөгч Жо Байден ард түмэндээ хандаж хэлсэн үгэндээ “Америкийн цэргийн хүчийг урт хугацаанд үлдээх сонголт байсангүй” гэв.  Талибаны цэргийн дэглэмээс дүрвэхийг хүссэн 120 мянга гаруй иргэдийг онгоцоор тээвэрлэх ажиллагааг зохион байгуулсан цэрэг, дайчдад энэ үеэр Ерөнхийлөгч талархал илэрхийлэв.Америкийн 6000 гаруй цэрэг онгоцны буудлыг хяналтандаа авч, Америк болон холбоотон улс орнууд, тэдэнтэй хамтран ажиллаж байсан нутгийн уугуул Афган иргэдийг нүүлгэн шилжүүлэх ажиллагааг амжилттай зохион байгуулсан.  Ерөнхийлөгч Жо Байден мягмар гаригт хэлсэн үгэндээ эх орондоо эргэж ирэхийг хүссэн Афганистанд байгаа 200 гаруй иргэдийг буцаан авчрах амлалт өглөө. Энэ үеэр Жо Байден өөрийнхөө гаргасан улс төрийн шийдвэрийг хүчтэй хамгаалж, “Энэ дайныг үргэлжлүүлэхгүй, Афганистан дахь дайн одоо дууссан” гэж мэдэгдсэн юм.

 Эх сурвалж BBC.Com